ميلاد لبنان مخطوف والعيد بالميلاد رهينِه…والعوض بسلامتكن! (بالعامية) لبنان والدولار سياره بلا فرامات ونازلِه متل الصاروخ صوب الوادي!

بزمن الميلاد، الأمل مخطوف بلبنان. حتى فسحة الأمل احتلوها تا صار العيش ضيق كتير “إكسترا سمول”! كَوانا الحليب وما عاد في لبن حتى ننفخ عليه! من زمان أهل السلطه أخدو كل عيادنا رهينِه، ومش ناويين يطلقو سراحن بالهيّن. الشعب صار عايش بزمن الآلام بشكل دايم، والعيد بالميلاد صار ذكرى للذكرى. وإذا العيد مش عم يعِيد فرحو علينا، المآسي عم تنعاد وتزيد.

سيناريو يتخطى مخيلات هوليوود!

تفجير المرفأ تخطى مخيلة أكبر سيناريست بهوليوود. صار عنا هيروشيما عاللبناني، مطرح ما بآخر الفيلم لا التحقيق بيوصل عا نتيجِه ولا بيطلع الحق على حدا! ونهب أموال الناس بالبنوكي تخطى ذكا أكبر عباقرة المافيا بالعالم. لا نظام “بونزي” ولا احتيال “بيرني مادوف” وصل لمواصيل واحد بالميِه من الابداعات المافيويه لحكومات لبنان ووزرا الماليه ورياض سلامه واصحاب ومدرا البنوكي! أما الكورونا، على رغم المآسي عالكون كلّو، إدارتها بلبنان شي تعتير. وصدقو حالن بوقت معين، عن غشمنِه، إنو إدارتن للأزمه أحسن من إدارة الأوروبيين! الله يستر اللبنانيين من الكورونا لأنو الآتي أعظم…بكتير!

رح نشّْك فرد شكِّه!

بكل بساطة… دولِه ما فيه! فيه أصنام زعما عم بيقاومو كل محاولِه لإزاحتن بتركيع أكتر لجمهورهن الخايف يفقد خط الدفاع الأخير (الوهمي) تبعو! والناس يللي عم بتقاوم عم تتعب. ويللي عم بيصير متعب هو سلمية التحركات. لأنو يمكن معو حق البعض؛ ان ما كبرت (اكتر من هيك بكتير) ما بتزغر! ويللي ما بيفهم بالمنيح بدك تجرِّب معو القبيح! بس أهل السلطه مسكِّر دماغن وبعدن مصدقين إنو “إيفري سينغ إيز أندر كونترول”!! بوقت الفوضى الأمنيه عم “بتزرزب” من كل بخاويش تايتانيك الوطن، وبلحظه معينه رح يوقف الغرق بهالطريقه، ورح نشك نزول فرد شكِّه!يعني الله يعين جهنم علينا!

عجيبة المصالحه!

لبنان مع الدولار سياره بلا فرامات ونازلِه نزول “متل الصاروخ”. يعني يا منصير بالوادي، يا منفوت بشي صخره، يا منضرب بشي شجره… وما في غير عجيبِه بتنقذنا! والعجيبٍه الظاهره الممكنه إنو حزب الله يتصالحو مع العرب حتى يفوت “الكاش ماني” بقوه عا لبنان! وإذا ما صارت هالعجيبِه أو شي عجيبِه تانيي، أكيد العيد مش راح ينعاد على كتار من اللبنانيين. بدنا صلا كتير لأنو الخوف متل ما صار الفايسبوك ورقة نعوِه مفتوحه، نصير قول لبعضنا بالعيد اللي جايي العوض بسلامتكن بدل من “كل عيد وإنتو بخير”!

المقالات المنشورة تمثل رأي كتابها