سمير سكاف

الجمعة ٢٤ نيسان ٢٠٢٠ - 16:27

المصدر: صوت لبنان

باديش ممكن يصير الدولار؟! بمية ألف ليرة؟!

من عدة أشهر قلت انو يمكن الدولار يتخطى العشرة الاف ليره… واكتر بكتير! السبب الظاهر هو عدم وجود أي ضوابط. السقف مفتوح! السبب التاني هو عدم وجود اراده سياسية! الطبقة السياسية مشغولي بتناتش المكاسب والكراسي. متفقه انو صور الزعما يضلو بالشوارع، وانو استقلال القضاء واستعادة الأموال المنهوبة ومساعدة الفقرا… مش وقتن هلاء! (ماليا، نحنا عطينا حلول).
لكن الأخطر هو يللي كنت سميتو بملازمة ستوكهولم Stockholm Syndrome … يعني في كتار من اللبنانيي مغرومين بيللي خاطفهن، ويللي عم يقاهر فيهن! ومقتنعين انو يللي عم يذلوهن هني ممكن يخلصوهن… صبرو تا نشوف! عطوهن فرصة!!!
“يا عالم يا هو” التيتانيك عم تغرق! بس هالمره مش عالشاشه. مش مهم اديش رح يصير الدولار! المهم يبقى حدا يخبر اديش صار! بهالوقت خلونا عم نتفرج عليه عم يطلع! بس الحقيقه نحنا عم نزعل!!! ومش قاشعين الويلات يللي جايتنا! الحل بيبلش بإنو الشعب فعلا يصير بدو الحياة. بينزل عالشارع. وساعتها بس بيستجيب القدر!

المقالات المنشورة تمثل رأي كتابها