بورتريه موجع للبنانيين!

نحن بلبنان منفضل وهم كاذب على حقيقه بتوجع!

نحن بلبنان منفضل نتعلق بحبال الهوا بدل ما نتعلق بزنودنا!

نحن بلبنان بدنا الثوره، بس ما تقطع طريق ولا تزعج حدا. نزلو عا 6 سنس هلاء وينن؟ ليه ما عم ينزلو!

نحنا بلبنان منفضل ننتقد البيضحي كرمالنا ونزقف ليللي بيسرقنا!

نحن بلبنان منفضل نقول مش طالع بإيدنا شي بدل ما نجيب حقنا بإيدنا، وبالقوة.

نحن بلبنان منفضل زعيم مذهبنا هو وعم يدبحنا كل يوم على مواطن عم بيدلنا عا طريق الخلاص!

نحن بلبنان منفضل نضّيع وقتنا بتهريج ومتاريس مذهبيه عا تقريب الساعه وعا باربي… بدل ما نتوحد!

نحن بلبنان منفضل نخانق ونتخانق ونعمل ثورات على الواتساب ونطق حنك بدل ما نسترد حقنا بالشارع.

نحن بلبنان منفضل نسرق عاصيرفه وننسرق ب151 و158 والفريش دولار بدل ما نرد حقنا من البنوكي

نحن بلبنان منفضل كل واحد يظمط بريشو بدل ما نوقف حد بعض بالدوا وبالمستشفى وبالمدرسه.

نحن بلبنان منفضل ما نتضامن، بدل ما نلاقي شغل لبعض. بس أوعى حدا يعمل مجهود ويخدم التاني!

نحن بلبنان منفضل نغرق كلنا وما نمد إيدينا لبعض! مفكرين إنو التانيين بيغرقو بس نحنا منظمط!

نحن بلبنان عنا كهربا دوله وموتور وطاقه شمسيه وبطاريات وعايشين عالعتم بدل مانجبرن يصلحو الكهربا

نحن بلبنان منفضل ناس بتعلي المسبه وبتجيب جمهور على ناس عندها أخلاق وبتعطي حلول!

نحن بلبنان منفضل نكون أذكى شعب بجهنم! بدل ما القيد ينكسر!

المقالات المنشورة تمثل رأي كتابها