شو هالشعب نحنا! وشو هالعصفوريه! مخانقين عا باربي؟!

شعب نزلت قدرتو الشرائية 100 مرة وسرقولو كل مصرياتو بالبنوكي وكل ثرواتو ووصلو عا جهنم. ودبحولو كل أحلامو، ومع هيدا:

خبريه بتاخدو وخبريه بتجيبو! وبيعمل معارك نابوليونية وثورات عالواتساب! وبيسب كل الناس، وبيصير طائفي ومذهبي، شي كرمال تأخير وتقريب الساعه، وشي كرمال المثليه وشي كرمال فيلم باربي… شي خوات عالآخر!

ممكن ينفهم تعصب بمشكل الكحاله، بس بفيلم باربي! يا عمي بكرا جايينا كل شي في كوارث مع هالحكومه المجرمه، والغبيه، يللي ما عندا حلول غير زيادة التعرفات والضرايب 30 مره. أيمتى منوعى؟!

وأنا عم صرِّخ وصرِّخ إنو جايي السقوط الحر، يعني فرد وقعه، عا راسنا شك، وتفليسه وكوارث! وهودي سهيرة البارات ويللي بيعبو المطاعم أقليه، وما بيطلعو 10%! وهني لا قادرين يدفعو معاشات الجيش ولا القطاع العام ولا قادرين يفتحو الاداره ولا يحفظو الأمن، ولا قادرين يتكفلو بحدا بالمستشفى! وحزب الله عايش عا كوكب تاني مش قاشع وجع الناس ولا حاسس فيهن. المهم يحمي سلاحاتو! وبعدنا مش عم نوعى! يعني فعلاً نحنا بعصفوريه! ومش رح نتركو حتى لألله (استغفر الله) إنو يساعدنا!

المقالات المنشورة تمثل رأي كتابها