من ديوان “سنين مالحا” (1987) بْ صوت زينا زيادي

بِالحِرش. مطرح ما السجر طالع،

بيتنا. مْداميكو من مْقالع

ماتت. وفرَّخ مطرحا الوزّال

وزعرور بَرّي، مِرّ، ما بينطال

وعجرَم عَ طولو منحني وراكع

بيتنا واقف متل ناطور

ما بيتّكي. وبيطلّ عَ القاطِع.

مطرح ما باقي بَعد كم عَصفور،

يروحو ويجو عَ الموسم الراجع.

عَ الباب، ما بْتِقرا بحبر مَغرور

إسمي مْزَخرَف، والحبر فاقِع

بيتنا مفتوح، ما بَدّو جرَس

وْلا ناضور زغير، جاسوس البيوت:

هادا فتحلو كتير. هادا ما تفوت.

وهاداك ضَلّ بعيد. وَدّيلو حَرَس

أغلا ما عِنّا، هَمس وشبابيك

بتطلّ عَ الأربع خَمس مَيلات

وعطر بَرّي يمرُق يحاكيك

بلفتة ولاد زغار. والنسمات

وأغلا بعد. ريحة الصيف لّي مَرَق

وسرّ العيون العَلَّموني عَ السكوت

انْ ضِحكو. بحطُّن شِعر عَ رخام وورَق

انْ حِزنو، بنوس، بصير شَمعا عم تموت.