من ديوان “سنين مالحا” (1987) بْ صوت زينا زيادي
أنا عصفور الشَوب وغيوم الوَعد
جناحي فِيا من ريحة الغابات
وزَخّ الشتي والعاصفي والرعد.
ولون المَسافي. ومن نِدي الغيمات
كل النهورا والنبوعا بعرِفا
والصخور العاليي لّي فَوق
وتاج الطفولي عا جبال الشَوق
والغصون اليابسي
والغصون اللابسي
ألوانها. غاطط عليها. وقاطِفا
والزهور المستحيّي. الما حَدا
مَدّ إيدو صَوبها. وقَلاّ تَعي
عَ بيتنا. مارِق لَعندا وشايفا.
والزهور العِطرها من دون صَدا
بتنطُر رجوعي. كل سني بتحكي مَعي.
لَمّا تهِّب العاصفي وتقَصِّفا.