من ديوان “آخ” (1974) بصوت بْ صوت زينا زيادي
لَو ما نسكَر هاك السَكرا
يا خَجلتنا، كِنّا بقينا:
الخَوف، الحزن، الوَهم، النَطرا،
وزَورَق عم يعتَق عَ المينا
ما سافَر بعد وْلا سَفرا.
وكنّا متل الغابي ربينا
وْيِبست فينا اللحظا الخَضرا.
وكنّا متل القَصر الفاضي
نغفا ونوعا تحت الغَبرا.
نكبَر عا فتافيت الماضي
ويمرُق ما يعرفنا البكرا
وكنّا صرنا هاك العِشبي
المِصْفَرّا عا باب مسكَّر.
والرَقصا الخلصِت، واللعبي
المَطعوجي، ودولابا مكسَّر.
والعِلبي العَا ضَهر خزاني
مش مفتوحا، ولَونا أصفر.
والوَقفي عَ الباب التاني
والوَرقا البَيضا بالدفتر.
والشعب الما بيعرف يغضَب
ومْفَرفط متل الرمّاني،
وكنّا كتاب كبير مدهَّب
نايم عا مَرمَر زَماني.