من ديوان “مبارح كنّا ولاد” (1984) بْ صوت زينا زيادي

                    I

نامي، يا زهرة إيّامي

الأطفال المن عمرِك نامو

وشبّاكِك سَرَّب حَمامو.

عم يهدُل ويقلِّك نامي

حاجي تشدّيلي بكمامي

                   II

يا طفلة حُبّي المزروبي

وعم تبكي بسرير النطرا.

بَدّي جبلِك قمَر جنوبي

شفتو عَ لَيل كفَرقطرا.

وفي طفل بهاك الزاروبي

عم يكبَرلِك يا طَيّوبي

وفي وردي خبِّتلِك عطرا.

ووردي عم بتقلِّك نامي

حاجي تشدّيلي بكمامي

                     III

بَدّي جبلِك قصر زغيَّر

لَعّوبي. بصَرتو بمنامي

ومشلح ملك الدهب الأصفر

قلِّك هادا يَلّلي أخَّر

عَ المينا بابور السكَّر

تَ تضَلّي تبكي وما تنامي

ويبكيلِك فرخ الحَمامي

                      IV

وبكرا بعلِّقلِك مرجوحا

باللوزي، وهِزِّلاّ شلوحا.

خَلّي وراقا العم يصفَرّو

يهزّو، يفترقو، ويهرّو.

ورقا زغيري ورقا كبيري

وورقا عم توقع قدّامي.

اللوزي تهزّ وإنتي تطيري

بعمري، بجوانح أحلامي

ودقة قلبي تقلِّك نامي