المصدر: صوت لبنان

عبد الصمد : الجيش والعدالة يحمياننا والمطلوب استعادة سيادة الدولة

القى الأمين العام لجبهة المعاضة اللبنانية الكتور زياد عبد الصمد كلمة خلال الوقفة الاحتجاجية التي نفذت اليوم امام قصر العدل دعماً للعدالة والقاضي بيطار جاء فيها:

من يومين احتفلنا بالذكرى التانية للثورة لي انطلقت ضد الفساد وانهيار الدولة وغياب السيادة
ومن اكتر من سنة انفجر ببيروت ثالث أكبر قنبلة شبه نووية بالعالم دمرت المرفأ ونصّ العاصمة وراح ضحيتها اكتر من 220 شخص كله نتيجة المغامرة بحياة الناس وعدم تحمل المسؤولية السياسية والإدارية والأمنية والقضائية، ورغم هالشي كله، ما فيه حدن مسؤول،
وما حدن بيعرف من وين وليش ولمين اجا النترات ومين اخذ الكميات الناقصة ولوين؟
وما حدن عرف كيف انفجرو وليش، رغم مرور اكتر من سنة على الحادثة الي شغلت العالم بس ما هزت ضمائر المسؤولين عنا المتمسكين بكراسيهم ومكتسباتهم واللي اتعودو الإفلات من المحاسبة والعقاب.
بعدو الانهيار ماشي ومكمّل بسرعة نحو جهنم تماما متل ما وعدنا الرئيس علناً، وما اخذوا ولا تدبير جدي ومسؤول لتدارك الوضع، حتى انن اخذوا اكتر من سنة لتشكيل الحكومة لانن اختلفوا فيها على الحصص وعلى الوزارات السيادية والخدماتية والوازنة.
يا عيب الشوم !!!
لبنان مش دولة فقيرة بس دولة منهوبة
اللبنانية ما بيستاهلو شو عم بصير فين،
وين ما راحو بالعالم ناجحين ليش بلبنان فشلنا؟
رح قلكن ليش:
لأنو عنا منظومة متحالفة مع دويلة ح-ز-ب ا-ل-ل-ه وبيحميها سلاح غير شرعي وصّلونا لهون
رجعونا للغة الشوارع والمفارق والعراضات بالسلاح الحي والمتاريس الافتراضية هي لغة الماضي البغيض، واللبنانيون تهجروا مرتين بسببها، مرة بالاستلحاق بعد اندلاع حرب ال٧٥، ومرة بالاستباق قبل اندلاع احداث الخميس، وللتذكير فقط ٦٠٠ الف لبناني هاجروا تهجيراً بسبب الحالة الاقتصادية، لكن ايضاً بسبب الحالة الامنية.
رجعونا للغة التهديد وعرض العضلات ومسح القدرات القتالية من أي جهة أتت ومعادلة ال١٠٠ الف صاروخ.
لأ، وبعدها مستمرة، شوفو شو عملو بالتحقيق بجريمة المرفا، طيّرو اول قاضي تحقيق لانو راح باتجاه معين بالتحقيق.
اجا القاضي التاني بدن يطيروه أو “يقبعوه” لان راح بالتحقيق بنفس الاتجاه، وتمسّكوا زورا بالحصانات النيابية لانن عارفين انن متورطين بالجريمة
بس هني، المتّهمين بالإهمال والتواطؤ والمشاركة بالجريمة، ماسكين السلطة ومش رح يتخلو عنها بسهولة.
بالعكس، حاولوا بكل الأساليب التعسفية والتهديد والوعيد اقصاء القاضي التاني عن الملف بس لانه مستقل وما حدا قادر يفرض عليه رايه،
يمكن لأنو عم بقرّب من الحقيقة اللي بتدينهم
ولأنو يلّي بِهدّد، يعني هو متورّط
نزلوا على الشارع الأسبوع الماضي بمظاهرة قالوا انها سلمية، كانو فوتونا بحرب أهلية نتيجة الأحقاد والتآمر على لبنان،
ومنطلب من الجيش والأجهزة الأمنية الشرعية ان تقوم بدورها
نحن اليوم جينا لنأكد انو-
الجيش وحده بيحمينا
العدالة وحدها بتحمينا
الحقيقة وحدها بتحمينا
المحاسبة وحدها بتحمينا
لا تهديد ولا ترغيب ولا أصبع مرفوع ولا جحافل جيوش العالم قادرة تركّع شعب مؤمن يقضيتو، ونحنا شعب قضيّتنا محقة وما من خاف من حدا
جينا لنأكد أيضاً على انو خيار الدولة وهو خيارنا الوحيد،
وحتى تقدر الدولة تحمينا لازم نتمسك فيها ونتمسك باستقلالية القضاء لان العدل أساس الملك والقضاء أساس العدل،
جينا لندعم القاضي طارق البيطار ونطالب انو يخلّوه يقوم بدوره ويكمّل التحقيق من دون تدخل من أي كان بانتظار القرار الظني الي بتنظر فيه اعلى محكمة بلبنان وفيها كبار قضاتنا الي منحترمهم
نحن جينا اليوم، حتى ندين التدخّل السافر والتعسفي بالقضاء وللتحذير من الانجرار الى 7 أيار جديدة لتغيير المعادلة السياسية الداخلية بقوة السلاح لان هيدا الامر بوصّل لبنان الى الكارثة.
ولّى زمن الإفلات من العقاب!
المطلوب استعادة الدولة من خلال استعادة سيادتها الكاملة على الأراضي اللبنانية وعلى قرارات الحرب والسلم والسياسة الخارحية
نحن بدنا يكون السلاح الوحيد بلبنان هوي سلاح الشرعية اللبنانية
تعازينا لضحايا المرفأ ولكل ضحايا الغدر والتضليل
تحية للقاضي النزيه والمقدام طارق البيطار
تحية لقضاة لبنان المستقلين
انقاذ لبنان بايدكم
عشتم وعاش لبنان