من ديوان “آخ” (1974) بْ صوت زينا زيادي

كنت الملك

من قَبل مَ كانو الملوك،

بتبقا ملك

من بعد مَ يفِلّو الملوك.

وكنت قَبل الإنبيا 

إنت النَبي،

وبكرا بيصيرو الإنبيا

حكاية صَبي

وبتضَل إنت تدِلّ

عَ الرح يجي، وبتضَل

تشِم الهَوا بِالكِلّ

والأرض وَرقا وضَل خرتش يا صَبي

وانْ شِفت ناس مْكَوّمين

وكتار هنّي، وهيأتُن نتفي

متل الوراق مدردرين

بالليل عا بوّابة الصدفي.

اضْربهُن بكلمي تْوَجّعُن

ميّة سني، وتوّقعُن

بآخ البطولي، وتكسُر الصدفي.

وبتضَل إنت الجَمر لَمّا يبردو

أهل الأرض، أو يحزَنو، أو يشردو

أو ينعَسو بالصَيف عَ بواب القَدَر.

أو يبعَتو بالريح مَركب عَنكبوت.

أو يسكتو، أو يركَعو قبال الصوَر.

وبتضَل طفل يفزّ من قَلب السكوت

بليلة قَدَر وتزّت عَ سكوتُن حجَر.